قامت قوات الأمن المصرية باختطاف الطبيبة أسماء خلف من أمام مقر عملها بمستشفى القصر العينى بأسيوط حيث تعمل طبيبة بأمراض النساء والتوليد وذلك بتاريخ 18 إبريل2014 واحتجازها بمكان غير معلوم حتى الأن.

فيديو ويروى أخو المختطفة أسماء تفاصيل اختفاءها بمؤتمر بمركز هشام مبارك للقانون .

ويذكر أخو المعتقله تفاصيل البحث عن الطبيبة أسماء على موقع التواصل الاجتماعى “الفيسبوك ” ويقول :

#حدث_بالفعل
في يوم قولت يا محمد انت روحت لنائب العام والمحامي العام ولفيت ع اقسام شرطة وسجون وعملت بلاغات وشكاوي كتيرررررر .. وقررت اني اتوجة بشكوي للقوات المسلحة اللي هو #جيش بلدي علي اساس ان الجيش والشعب ايد وحده … وكنت فاكر ان الجيش ممكن يكون عنده حل ويعرفوا يوصلوني لمكان احتجاز شقيقتي الدكتورة أسماء .. وفعلا روحت أسيوط وسألت في منطقة التجنيد اللي فشارع الجمهورية قالوا احنا ملناش دعوة بالكلام ده والشكاوي .. عايز تروح تعمل شكوي روح المنطقة الجنوبية للقوات المسلحة اللي هي بتبعد عن أسيوط ساعة تقريبا … وقالي هما اخرهم الساعة 2 الظهر .. اخدت تاكسي ورحت المنطقة الجنوبية قالوا لي اننا ملناش فيه ممكن تروح منطقة تاني أسمها خمسة نيابات .. فضلت ماشي ماشي وكانت الشمس في اليوم دا عمودية وسخنة خالص انا فاكر اليوم دا كويس ومش هنسي ابداااا .. المهم وصلت المكان دا وكانت البوابات مقفولة .. فضلت اخبط علي الباب لحد مافي عسكري سأل فيا وكان بيكلمني من حته صغيرة أوووي في الباب يعني مفيش غير عنية اللي ظاهرة … انا كنت كاتب ورقة علي الكمبيوتر فيها موضوع اختطاف الدكتورة أسماء كله من يوم أختطافها لحد اخر بلاغ انا عملته .. شرحت الموضوع للعسكري واديته الورقة شافها وأول كلمة قالها حسبي الله ونعم الوكيل .. وراح فاتح الباب وقالي تعاله انا هحاول اساعدك واخليك تقابل قائد المنطقة .. تمام … المكان دا يا جماعة خاص بالنيابات العسكرية … كنت حاسس اني ممكن يكون في نتيجة لحد ما العسكري قالي يا محمد في عميد واقف قريب مننا قالي تعاله يمكن يقدر يساعد وفعلا اخدني للعميد وقاله محمد اخته دكتورة ومختطفه من قبل قوات الامن الوطني وبيدور عليها فكل مكان .. اخد الورقة من العسكري اللي فيها الموضوع كامل وفيها كمان أرقام البلاغات والشكاوي اللي كنت عاملها كلها .. بص فيها وبعدين قالي احنا ملناش دعوة بالحاجات دي .. وقال كمان بالحرف هي اختك دي من الجيش .. قولتله يعني ايه !! قالي يعني هي تابعه للقوات المسلحه يعني بتشتغل تبع الجيش .. قولتله لا .. بس اختي مواطنه مصرية .. راح سيبني وماشي .. طبعا انا كنت مدايق جدااا وماسك نفسي بالعافية من الاسلوب وطريقة الكلام والمعامله اللي انا شوفتها من الراجل دا .. الله غالب .. وبعدين العسكري قالي تعاله يا محمد واخدني اتجاه البوابه وجابلي مية شربت وقالي قوووول يااااارب … قولت ونعم بالله قادر علي كل شئ .

قالي انا هحاول ادخلك زي ما قولت لقائد المنطقة … وكان بيشكر فيه كتيرررر انه راجل محترم و قريب من ربناااا .. المهم اخدني وفضلنا ماشين شوية .. احنا وفالطريق للمكتب بتاع القائد شوفت مكان زي الزنزانه بالظبط بس لا يتجاوز حجمه 3 متر × 2 متر .. وفي ناس جوه المكان دا سوري في اللفظ بالهدوم الداخلية وكان عددهم كتير لدرجة انهم كانوا نايمين علي جنبهم عشان المكان يسعهم كلهم وكان الجو حر جدا وكانوا كمان حطينلهم مروحة استند كبيرة بس كانت قصاد باب الزنزانه من بره والله كما حدث .. فسألت العسكري دول مين .. قالي ملكش دعوة .. قولتله دول باين عليهم ناس محترمه !!! قالي يعم دول ظباط جيش (( درجات مختلفة )) كنت مستغرب جدااا من الكلام دا .. فسألت طيب دول محبوسين ليه قالي عشان بيتكلموا في السياسة وضد النظام وفي منهم ناس كانت تنزل مظاهرات ومش بيحبوا السيسي .. وقال العسكري حسبي الله ونعم الوكيل وقالي متخفش الثورة جاية جاية وقالي الجيش في ناس كتير مش راضية علي بيحصل في البلد .. انا كنت فرحاان جدا بكلام العسكري بس مكنتش مصدق اللي بيحصل دا !!! المهم كملنا لمكتب القائد العسكري قالي هدخل انا الاول وهقدمله الورقة دي ولو قالي ادخلك .. هدخلك عشان ميحصلش مشكلة قولت حااااضر .. دخل العسكري المكتب قعد تقريبا 8 دقايق وبعدين خرج وقالي القائد كان زعلان أووووي عشان هي بنت وكده وقال كمان حسبي الله ونعم الوكيل .. بس للأسف مش هيقدر يساعدك .. قولت للعسكري شكراااا جدااا ليك قالي انا كان نفسي اساعدك .. واخد الورقه مني وقال انا هخليها معايا يمكن اعرف اساعدك شكرااا جداااااااااااااااا للعسكري اللي انا مش عارف اسمه ايه ..

هي دي مصر الناس لازم تفهم …. لازم تفهم … حسبنا الله ونعم الوكيل ، ربنا قادر علي كل شئ وانا عندي يقين ان ربنا بيحب شقيقتي الدكتورة أسماء عشان هي أنسانة بكل ماتحمل الكلمة من معني بتحب تساعد الناس أوووووي وبتحب تشوف كل الناس فرحانه ومبسوطه ربنا يحفظك يا أختاه وأن شاء الله تكوني قريب معانا .

انا كمان هقولكم علي حاجه الدكتورة أسماء كانت بتعملها ..
الدكتورة أسماء اكبر مني ب سنة يعني هي كانت في سنة خامسة ابتدائي وانا كنت في سنة رابعة وكانت ديما تطلع الاولي ع المدرسة لحد ما دخلت الجامعة … المهم انا كان معايا ولد في الفصل أسمه ((شنودة يوحنا )) الولد دا كان طفل متربي داخل ملجأ تابع للكنيسة انا قولت للدكتورة أسماء عنه .. تخيلوا ان أسماء كانت بتستنا الفسحة تيجي عشان تاخد السندوشات بتعتها وتروح تديها لشنودة كل يوم وكانت بتجمع مصروفها كل يوم عشان تشتري (( جزمة )) لشنودة … وكانت كمان بتساعده في المزاكره .

ربنا يجعله في ميزان حسناتك يا دكتورة ان شاء الله … انا بقول كده عشان الناس لازم تعرف هي مين الدكتورة أسماء … ووووووووووحشتيني أووووووووووي يا أسماء .

الدكتورة أسماء معتقلة بقالها 6 شهور و 14 يوم ولحد النهارده مكان احتجازها غير معلوم .
#حسبنا_الله_ونعم_الوكيل
#الدكتورة_أسماء_فين
#الدكنورة_أسماء_فين_السيسي
#الدكتورة_أسماء_فين_الحكومه
#الدكتورة_أسماء_فين_وزير_الداخلية
#الدكتورة_أسماء_فين_النائب_العام
#الدكتورة_أسماء_فين_وزير_العدل
#الدكتورة_أسماء_فين_النيابة_العامه
#الدكتورة_أسماء_فين_الامن_الوطني

رابط ذات صلة : أسماء خلف